იუსტიციის სამინისტრო: ზურაბ ადეიშვილის თავისივე მოთხოვნით საქართველოს მოქალაქეობა შეუწყდა

ავტორი ქეთი ბაჭველაშვილი

ზურაბ ადეიშვილს საქართველოს მოქალაქეობა შეუწყდა. აღნიშნულის შესახებ განცხადება იუსტიციის სამინისტრომ გაავრცელა.

განცხადებაში აღნიშნულია, რომ საქართველოს იუსტიციის ყოფილ მინისტრს მოქალაქეობა თავისივე განცხადების საფუძველზე შეუწყდა.

“მიმდინარე წლის 4 მარტს, საქართველოს იუსტიციის სამინისტროს სსიპ სახელმწიფო სერვისების განვითარების სააგენტოს განცხადებით მიმართა ზურაბ ადეიშვილმა (წარმომადგენლის მეშვეობით) და მოითხოვა საქართველოს მოქალაქეობის შეწყვეტა, რადგან უკრაინის მოქალაქეობა მიიღო.

სააგენტომ თავად განმცხადებლის მიერ მოთხოვნილ 80-დღიან ვადაში განიხილა და შეისწავლა ზურაბ ადეიშვილისთვის საქართველოს მოქალაქეობის შეწყვეტის სამართლებრივი საფუძველი, რის შემდეგაც, საქართველოს მოქალაქეობის შეწყვეტის თაობაზე მომზადებული დასკვნა, მოქმედი კანონმდებლობისა და პროცედურების შესაბამისად, მიმდინარე წლის 7 მაისს გადაუგზავნა საქართველოს პრეზიდენტს.

საქართველოს პრეზიდენტის 2021 წლის 13 მაისის №204 ბრძანებულებით, „საქართველოს მოქალაქეობის შესახებ“ საქართველოს ორგანული კანონის 21-ე მუხლის პირველი პუნქტის „გ“ ქვეპუნქტის შესაბამისად, უკრაინის მოქალაქეობის მოპოვებასთან დაკავშირებით, ზურაბ ადეიშვილს მისივე მოთხოვნით შეუწყდა საქართველოს მოქალაქეობა” – ნათქვამია იუსტიციის სამინისტროს მიერ გავრცელებულ განცხადებაში.

You may also like

Leave a Reply