სუს-ი: მედიასა და პოლიტიკურად დაინტერესებულ პირებს მოგიწოდებთ, გამოძიების დასრულებამდე თავი შეიკავოთ არაზუსტი ინფორმაციის გავრცელებისგან 

ავტორი ქეთი ბაჭველაშვილი

ინტერნეტსივრცეში გავრცელებულ მასალასთან დაკავშირებით, რომელიც სავარაუდოდ, სუს-ის საიდუმლო მასალებია სახელმწიფო უსაფრთხოების სამსახური განცხადებას ავრცელებს.

უწყება ეხმაურება პროკურატურის მიერ გამოძიების დაწყებას და აღნიშნავს, რომ მის ინტერესშია ის ობიექტურად სრულყოფილად წარიმართოს. სახელმწიფო უსაფრთხოების სამსახური ასევე მოუწოდებს მედიასაშუალებებს, გამოძიების დასრულებამდე თავი შეიკავონ არაზუსტი ინფორმაციის გავრცელებისგან.

“მაღალი საზოგადოებრივი ინტერესიდან გამომდინარე, გვსურს გამოვეხმაუროთ ბოლო დღეებში მედიასაშუალებების მიერ გავრცელებულ ინფორმაციას.

როგორც მოგეხსენებათ, საქართველოს პროკურატურამ კერძო კომუნიკაციის საიდუმლოების დარღვევის ფაქტზე, საქართველოს სისხლის სამართლის კოდექსის 158-ე მუხლის 1-ლი და მე-2 ნაწილებით დაიწყო გამოძიება. საქართველოს სახელმწიფო უსაფრთხოების სამსახური მზად არის გამოძიების ყველა ეტაპზე მჭიდროდ ითანამშრომლოს საქართველოს პროკურატურასთან. უწყების ობიექტურ ინტერესს წარმოადგენს ჩატარდეს კომპლექსური და სრულყოფილი გამოძიება, რათა პასუხი გაეცეს ყველა კითხვას.

ამასთან, სახელმწიფო უსაფრთხოების სამსახური მოუწოდებს მედიასა და პოლიტიკურად დაინტერესებულ პირებს, გამოძიების დასრულებამდე, თავი შეიკავონ არაზუსტი და გადაუმოწმებელი ინფორმაციის გავრცელებისაგან, რადგან მსგავსი ინფორმაციის ტირაჟირება შეურაცხყოფს ცალკეული ადამიანების,

უსაფრთხოების ოფიცრებისა და მთლიანად სამსახურის პატივსა და ღირსებას, ამცირებს ნდობას სამართალდამცავი უწყებების მიმართ და უკიდურესად აზიანებს სახელმწიფოს უსაფრთხოების სისტემას” – წერია სახელმწიფო უსაფრთხოების სამსახურის მიერ გავრცელებულ ინფორმაციაში.

You may also like

Leave a Reply