ცესკო ქუთაისის  124-ე საარჩევნო უბანზე  ნაწილობრივ შედგენილ შემაჯამებელ ოქმთან დაკავშირებით განცხადებას ავრცელებს

ავტორი Black on White - შავით თეთრზე

“საუბნო საარჩევნო კომისია ხმის დათვლის პროცესის დასრულების შემდეგ შემაჯამებელ ოქმს შეადგენს და მასზე ხელმოწერები გაკეთდება კანონით დადგენილი წესით” – ცესკო ქუთაისის  124-ე საარჩევნო უბანზე  ნაწილობრივ შედგენილ შემაჯამებელ ოქმთან დაკავშირებით განცხადებას ავრცელებს.

„ქუთაისის საოლქო საარჩევნო კომისიის 124-ე საარჩევნო უბანზე ნაწილობრივ იქნა შევსებული საუბნო შემაჯამებელი ოქმი, რომელსაც უბნის 14 წევრი, მათ შორის სხვადასხვა პარტიების მიერ დანიშნული წევრები აწერენ ხელს. ოქმის ფოტო გავრცელდა სოციალურ ქსელებსა და სხვადასხვა მედიასაშუალებებშიც.

გვინდა ცალსახად განვაცხადოთ, რომ აღნიშნული წარმოადგენს გადაცდომას და ქუთაისის საოლქო საარჩევნო კომისიას ექნება შესაბამისი რეაგირება. ოქმი განადგურდება და საუბნო საარჩევნო კომისიას გადაეცემა ახალი შემაჯამებელი ოქმი. საოლქო საარჩევნო კომისია იმსჯელებს 124-ე საარჩევნო უბანში შემაჯამებელ ოქმზე საუბნო საარჩევნო კომისიების წევრების მიერ ხელმოწერების წინასწარ გაკეთების ფაქტზე.  ხოლო საუბნო საარჩევნო კომისია ხმის დათვლის პროცესის დასრულების შემდეგ შემაჯამებელ ოქმს შეადგენს და მასზე ხელმოწერები გაკეთდება კანონით დადგენილი წესით.

საარჩევნო ადმინისტრაციას ყოველთვის ექნება შესაბამისი რეაგირება მსგავსი ტიპის გადაცდომებზე და მოვუწოდებთ ყველა დონის საარჩევნო კომისიას დაიცვან საარჩევნო კანონმდებლობით გაწერილი ნორმები, რაც აუცილებელია კენჭისყრის პროცესის მაღალპროფესიულ დონეზე წარმართვისთვის.“- აღნიშნულია ცესკო -ს მიერ გავრცელებულ განცხადებაში.

შეგახსენებთ, რომ ინფორმაცია აღნიშნული დარღვევის შესახებ ერთიანი ნაციონალური მოძრაობის ქუთაისის მერობის კანდიდატმა, ხატია დეკანოიძემ გაავრცელა.

ცნობისთვის, შემაჯამებელი ოქმი ხმის მიცემის პროდურის და მიღებული ხმების დათვლის შემდეგ დგება. კომისიის წევრები ხელმოწერით მასში მოცემული ინფორმაციის ნამდვილობას ადასტურებენ.

You may also like

Leave a Reply