15:00 საათისთვის ამომრჩეველთა აქტივობამ 33.2% შეადგინა

ავტორი ქეთი ბაჭველაშვილი

ამომრჩეველთა აქტივობამ 15:00 საათისთვის 33.2% შეადგინა, რაც რაოდენობრივად 1 160 413 ამომრჩეველია – ამის შესახებ ცენტრალური საარჩევნო კომისიის პრესპიკერმა ნათია იოსელიანმა საინფორმაციო ბრიფინგზე განაცხადა.

​მან ამომრჩეველს კიდევ ერთხელ მოუწოდა აქტიურობისკენ. მან კრწანისის ოლქში დანერგილ საპილოტე პროექტზეც ისაუბრა:

“შეგახსენებთ, რომ დღეს №4 კრწანისის საარჩევნო ოლქში 28  საარჩევნო უბანზე ხმის მიცემის პროცედურა საპილოტე პროექტის ფარგლებში ელექტრონული ტექნოლოგიების გამოყენებით მიმდინარეობს. ამომრჩევლები ხმას სპეციალური აპარატის გამოყენებით აძლევენ, აპარატის საშუალებით შედეგები კენჭისყრის დასრულებისთანავე გახდება ცნობილი. თუმცა აღნიშნულ უბნებზე ბიულეტენებს ასევე დაითვლიან საუბნო საარჩევნო კომისიების წევრები” – განაცხადა იოსელიანმა.

​ცესკოს პრესპიკერმა 15:00 საათისთვის დაფიქსირებულ დარღვევებსა და საჩივრებზეც ისაუბრა.

“მინდა წარმოგიდგინოთ ინფორმაცია საჩივრებთან დაკავშირებით, 15:00 სთ-ის მდგომარეობით საქართველოს მასშტაბით საუბნო საარჩევნო კომისიებში შესულია 175 საჩივარი, მათი უმეტესობა ეხება პროცედურულ დარღვევებს და მოთხოვნილია კომისიების წევრების დისციპლინური პასუხისმგებლობის დაკისრება.

დღეს ასევე ერთ-ერთმა დამკვირვებელმა ორგანიზაციამ გაავრცელა ინფორმაცია, რომ საუბნო საარჩევნო კომისიების 24,3 % დილის 08:00 სთ-ისთვის არ იყო მზად კენჭისყრის პროცესის დასაწყებად. ჩვენ დილიდან წარმოგიდგენთ ინფორმაციას კენჭისყრის პროცესის მიმდინარეობის თაობაზე და უკვე დილის 08:30 სთ-ზე გაცნობეთ, რომ კენჭისყრისთვის საუბნო საარჩევნო კომისიები 08:00 სთ-ზე გაიხსნა. მხოლოდ 10-15 წთ-ის დაგვიანებით გაიხსნა სულ 9 უბანი საქართველოს მასშტაბით (მთაწმინდა 1 უბანი, კრწანისი 2 უბანი, ვაკე 3 უბანი, დედოფლისწყარო  1 უბანი, ხობი 1 უბანი, მარტვილი 1 უბანი), რაც დამეთანხმებით, ვერანაირად ვერ იქნება 3664 უბნის 24.3% პროცენტი. ამავე ორგანიზაციის განცხადებით ზუგდიდის # 90-ე უბნიდან დამკვირვებელი გააძევეს, რომელიც მათი თქმით -„მთელ რიგ დარღვევებს აფიქსირებდა“. ჩვენ გადავამოწმეთ აღნიშნული ინფორმაციაც და გაცნობებთ, რომ რამდენიმე დამკვირვებელი კენჭისყრის პროცესს უშლიდა ხელს, ისინი ამომრჩევლების პირადობის დამადასტურებელ მოწმობებს უღებდნენ ფოტოს, ზემოაღნიშნულის გამო კომისიის თავმჯდომარემ გააფრთხილა ისინი, თუმცა მოგვიანებით მოუხდა მათი უბნიდან გაძევება” – განაცხადა ნათია იოსელიანმა საინფორმაციო ბრიფინგზე.

You may also like

Leave a Reply