ჟურნალისტი ვახო სანაია პროკურატურამ დაზარალებულად ცნო, ხოლო მის საქმეში დაკავებულ სამ პირს ჟურნალისტზე მისი პროფესიული საქმიანობის გამო განხორციელებული დევნისა და დისკრიმინაციის ნიშნით შეუწყნარებლობის მოტივით მუქარის ფაქტზე ბრალდება წაუყენა.

აღკვეთი ღონისძიების შეფარდებაზე სასამართლო დღეს, 18:00 საათზე იმსჯელებს. ბრალდების მხარე, ისევე როგორც დაზარალებული ვახო სანაია დაკავებულთა მიმართ აღკვეთ ღონისძიებად პატიმრობას ითხოვს.

როგორც ჟურნალისტმა ტელეკომპანია “ფორმულას” ეთერში განაცხადა, ყველა ბრალდებული მასზე ფიზიკურ ანგარიშსწორებაში მონაწილეობდა. სანაიას განმარტებით, სამი თავდამსხმელიდან 2 დანამდვილებით მას შეურაცხყოფას, როგორც ჟურნალისტს ისე აყენებდა.

“გიგაური, რომელიც პირველად წამოვიდა დასარტყმელად, როცა მე გავიწიე წაიქცა. შემდეგ ის ორი მოვიდა, ამასობაში ესეც წამოდგა, და სამივე მონაწილეობდა ფიზიკურ ანგარიშსწორებაში – ხელებით, ფეხებით. ამიტომ ამ ნაწილში სამივეა დამნაშავე. რაც შეეხება ჟურნალისტურ საქმიანობას, გიგაური ცალსახად დამნაშავეა, მეორეც, საყევარიშვილი ასევე ცალსახად დამნაშავეა. პირდაპირ ამბობდნენ, როგორც ჟურნალისტს ისე მაყენებდნენ შეურაცხყოფას, ასახელებდნენ ტელევიზიებს, სადაც ვმუშაობდი.

რაც შეეხება ერთ-ერთს, სახელაშვილს, ის ფიზიკურ ძალადობაში მონაწილეობდა, თუმცა მის ნაწილში არ მომისმენია ტელევიზიის ხსენება ან რაიმე ამდაგვარი ჟურნალისტურ საქმიანობასთან დაკავშირებით. თუმცა ისიც უნდა დაისაჯოს, რადგან ფიზიკურ ანგარიშსწორებაში მონაწილეობდა. სამივე ჩაჯდება ციხეში, ეს არის ჩემი მოთხოვნა, და არ გაბედოს სხვა რაიმე გადაწყვეტილების მიღება ხელისუფლებამ” – ამბობს ვახო სანაია.

დაკავებულების მიმართ წარდგენილი საბრალდებო მუხლები ძალადობით ან ძალადობის მუქარით განხორციელებულ დევნას, სიცოცხლის მოსპობის ან ჯანმრთელობის დაზიანების მუქარას და ძალადობას გულისხმობს, რაც სასჯელის ზომად 3 წლამდე პატიმრობას ითვალისწინებს.

ტელეკომპანია “ფორმულამ” გაარკვია, რომ ბრალდებულები ჭიდაობის ფედერაციის პრეზიდენტის, გეგა გეგეშიძის უბნელები და მეზობლები არიან. გეგეშიძე “ქართულ ოცნებასთან” დაახლოებული ერთ-ერთი პირია. ჭიდაობის ფედერაციის მაღალ ეშელონებში დასაქმებულნი აქამდეც არაერთ თავდასხმაში მონაწილეობდნენ, მათ შორის პოლიტიკური მოტივით განხორციელებულში. თავად პრეზიდენტი გეგეშიძე კი ბრალდებული იყო სპორტსმენ ზურაბ დათუნაშვილზე განხორციელებულ ფიზიკურ ძალადობაში.  ჭიდაობის ფედერაციის პრეზიდენტობამდე, ის შინაგან საქმეთა მინისტრის, ალექსანდრე ჭიკაიძის დაცვის უფროსი იყო. ალექსანდრე ჭიკაიძე ამჟამად ჭიდაობის ფედერაციაში მუშაობს. ის ვიცეპრეზიდენტის თანამდებობას იკავებს.

თავისუფლება არ იყიდება, თავისუფლება უნდა მოვიპოვოთ – ეს არის ის მთავარი მესიჯი, რითაც ნიკა მელია ციხიდან გამოგზავნილი წერილში პროკურატურას პასუხობს.

ერთიანი ნაციონალური მოძრაობის დაპატიმრებული თავმჯდომარის წერილი, რუსთაველის გამზირზე მიმდინარე საპროტესტო აქციაზე, პარტიის ერთ-ერთმა ლიდერმა ხატია დეკანოიძემ წაიკითხა:

“მოგესალმებით თანამებრძოლებს, მეგობრებს და თავისუფლებისმოყვარე სრულიად ქართველ ხალხს. მოგესალმებით და მიხარია, რომ მანდ ხართ, მიხარია, რომ არ ნებდებით, ერთად ვიბრძვით და ერთად გავიმარჯვებთ. ჩვენი მიზანი არ არის ერთი ადამიანის გამარჯვება, ჩვენი მიზანი საქართველოს გამარჯვებაა. ჩვენი მიზანი განვითარებული საქართველოა, სადაც თავისუფალი და წარმატებული ადამიანები იბრძვიან.

ხანდახან ცხოვრებაში დგება მომენტები, როდესაც ადამიანს დაღლა და იმედგაცრუება გეწვევა, მაგრამ მე ახლა ამ 4 კედელშიც კი ვგრძნობ, რომ ყოველი ახალი სირთულე, ყოველი ახალი წინაღობა, ყოველი ახალი გამოწვევა მეტ ძალას, მეტ შემართებას მატებს. ჩვენ გვაქვს ძალა, ჩვენ გვაქვს ნება, ჩვენ გვაქვს მიზანი და მოტივაცია მშვიდობიანად დავძლიოთ ქვეყანაში მიმდინარე რადიკალიზაციის და პოლიტპოლარიზაციის პროცესი – გვქონდეს უკეთესი საქართველო, თავისუფლება.

ვიცი, რომ ათასობით პატრიოტის უწყვეტი პროტესტი თბილისის ქუჩებში მოწინააღმდეგის ყველა გეგმას ჩაშლის. დღეს, აქ და ახლა, თბილისის ქუჩებში დგას მებრძოლი საქართველო, რომელიც მოიპოვებს საბოლოო თავისუფლებას. დიდ მადლობას ვუხდი ყველა იმ ადამიანს, ვინც 23 თებერვლის ძალისმიერი შტურმის დროს გამოიჩინა მაქსიმალური მოთმინება და სიმტკიცე ქვეყნის სასიკეთოდ, ვინც იდგა და იცავდა თავისუფალი საქართველოს იდეას, ვინც იდგა ჩვენს გვერდით, ვინც იდგა პარლამენტის წინ, ვინც იდგა ისტორიის სწორ მხარეს.

ჩვენ ბრალს გვდებენ 20 ივნისის სახელმწიფოს გადატრიალებაში, თუმცა ჩვენი მხრიდან 20 ივნისის მშვიდობიანმა პროტესტმა და 23 თებერვლის თავდაცვის ფორმამ ნათლად აჩვენა, თუ რა დამოკიდებულება გვაქვს სამშობლოს მიმართ. 2019 წლის 20 ივნისსაც და 2021 წლის 23 თებერვალსაც ჩვენ ვიდექით მშვიდობიანად, ვიცავდით ჩვენს ღირსებას, ჩვენს თავისუფლებას, გამარჯვებული საქართველოს იდეას, გავრილოვების, ლავროვებისა და მათი მორჩილი პირებისგან თავისუფალი, ერთიანი ქართული სახელმწიფოს იდეას.

ჩემგან მოითხოვეს ხარკი, თავისუფლების ქირა. მინდა მივმართო მას, ვინც სახელმწიფო მიიტაცა, თავისუფლება არ იყიდება, თავისუფლებით არ ვაჭრობენ, თავისუფლება უნდა მოიპოვო და დიახ, ის ხანდახან ბორკილებით, ციხით მოიპოვება, მაგრამ არასდროს – დანებებით, მხოლოდ ბრძოლით, მხოლოდ მოძრაობით, ახალი გამოწვევებით, ახალი პასუხებით, კრიზისში ახალი პასუხების პოვნით და ისევ მხოლოდ ერთიანობით.

მე მინდა, ვიყო საქართველოს თავისუფალი მოქალაქე, ვიაროთ წინ და ვიაროთ ერთად, დაბრკოლებების გარეშე, თავისუფლად. მე მინდა ვიცხოვრო ღირსეულად, მაგრამ არ გვაცლიან, მათ არ სჭირდებათ თავისუფალი ხალხი საქართველოში. საქართველოს სიყვარულისა და ღირსების დაცვის გამო თავისუფლება აღმიკვეთეს და 40 ათას ლარად იმავე თავისუფლების ყიდვა შემომთავაზეს.

თავისუფლება არ იყიდება, თავისუფლება უნდა მოვიპოვოთ.

დღეს საკნის 4 კედელი სწორედ თავისუფლებისთვის ბრძოლის გზაა. მე არასდროს ვყოფილვარ ასეთი თავისუფალი, როგორც ახლა. ჩემთვის და ჩვენთვის, თითოეული ჩვენგანისთვის თავისუფლება არ ღირს 40 ათასი ლარი. ეს არც ერთი ადამიანის, არც ერთი ჯგუფის და მითუმეტეს, არც პარტიული ბრძოლაა. ჩვენ, საქართველოს მოქალაქეები, მიუხედავად ჩვენი პოლიტიკური თუ სხვა შეხედულებისა, ერთად ვიბრძვით უზენაესი ღირებულებებისთვის, თავისუფლების, ღირსებისა და სამართლიანობისთვის.

ახლა დგება წუთი, როდესაც მოქალაქეების ჩვენი ხალხის ღირსების შემლახავთა მიმართ მოთმინება ვეღარ იქნება მისაღები. ვიბრძოლებთ ბოლომდე, რადგან ჩვენი ბრძოლა სამართლიანია და აუცილებლად გავიმარჯვებთ. მე დღეს პასუხი სანდროსთვის, რატომ არ მივედი სახლში, არ მაქვს. შეიძლება დღეს ვერ ავუხსნა, ან დღეს ვერ გაიგებს, მაგრამ ხვალ ის თავად გასცემს კითხვაზე პასუხს, რომ მე სწორედ ხვალინდელი დღის და ჩემი ქვეყნის უკეთესი მომავლის რწმენით ვიბრძვი აქედან.

ვარ მართალი, ვარ მხნედ”. – წერია წერილში.